0 مع اقتراب موعد تخرجكم ، ومع اقتراب موعد الفنداى بتاعكم .. أحب أوجه لكم كلمة
افرحوا .. وانبسطوا .. على قد ما تقدروا اليومين الجايين
اتصوروا مع بعض كتير قوى .. قوى قوى .. على قد ما تقدروا
بعد كام شهر من دلوقتى .. هتتفرجوا على صوركم دى وتبتسموا ابتسامة مش هعرف أوصفهالكم دلوقتى
هيبقى نفسكم تتجمعوا كده تانى .. و لكن للأسف ... مش هتعرفوا
فى منكم اللى هيبقى فى السعودية .. واللى فى الإمارات .. واللى فى أمريكا .. واللى .. واللى ...
فى منكم اللى هيفضل سينجل (زى حالاتى يعنى ) فمش هيعرف يشوف أصحابه المتجوزين إلا كل فين وفين
ومنكم اللى هيتجوز .. فمش هيعرف يشوف أى حد خالص ... إلا كل فين وفين
صحابك مع الوقت هيتغيروا ... مش هتقدر تحدد هم اتغيروا ليه ؟ ولا امتى ؟ بس هتعرف إنهم اتغيروا
عارف ... اوعى تزعل من صحابك لما يتغيروا... انت نفسك هتتغير .. كلنا بنتغير
الدنيا هتفرقكم ... هتغيركم ... غصب عنكم ... زى ما عملت فينا كلنا
يمكن انتم نفسكم تتخرجوا عشان تفرحوا .. عشان تخلصوا .. أو يمكن عشان الكلية صعبة
لكن اللى هتعرفوه بعد لما تتخرجوا .. إن الكلية صعبة .. لكن مش قاسية
الحياة أقسى بكتير
الشغل والحياة هيدوسوا عليكم .. هينسوكم معانى كتير حلوة كانت عندكم
هينسوكم يعنى ايه لمتك مع صحابك كل يوم .. والضحكة الصافية اللى بتجمعكم
هيعلموكم يعنى إيه أحقاد .. يعنى إيه نفاق .. يعنى إيه مصلحة
هيعلموكم تحبوا الفلوس ... وتجروا وراها ...
هتخليكم تدخلوا دوامة مش عارفين بدأتوها ليه .. ولا هتخلص امتى ...
وكل فترة هتقف مع نفسك كده .. وتسأل نفسك .. أنا ماشى فى السكة دى ليه ؟!
طيب انا مبسوط كده ولا لأ ؟!
مش هتعرف تجاوب على نفسك .. فهتكمل مشى .. هتكمل وخلاص
المسؤولية ...
إحساس المسؤولية هيخليك تعجّز .. وانت فى العشرينات من عمرك
مش هتبدأ تعدّ سنين عمرك إلا بعد ما تتخرج
ومع كل سنة بتمر ... هتفتح صورك القديمة ...
تشوف أصحابك فى الصور .. وتقول يااااااااه ... كانت أيام
يا ريتها ترجع تانى ..
بس للأسف .. مش هترجع
يمكن الكلام ده أنا بكلم بيه نفسى قبل ما أكلمكم
بس هى جت فيكم معلش
مش هتعرفوا معنى الكلام ده دلوقتى ... وما تستعجلوش عشان تعرفوه
أهم حاجة .. انبسطوا على قد ما تقدروا
واجمعوا أكبر قدر من الذكريات ..
الذكريات دى هى اللى هتخليكم تبستموا ... وممكن تخليكوا تعيطوا ... لما ما تبقوش عارفين تضحكوا
واقرا عن tools هتساعدك في تنظيم حياتك بعد التخرج من هنا
بقلم / محمود علام
بقلم محمود سعيد
اسمى محمود سعيد البوهى من مصر سنى 18 سنة اهتم بتطوير مدونات البلوجر قدر الامكان احب الجميع ولا اكره احد افتخر بكونى مصريا .| روابط هذه التدوينة قابلة للنسخ واللصق | |
| URL | |
| HTML | |
| BBCode | |
0 التعليقات:
إرسال تعليق